- வெப்ப மண்டலப் பயிர்களில் கறிவேப்பிலையும் ஒன்றாகும்.
- இதில் இரண்டு ரகங்கள் உள்ளன. நாட்டுக் கறிவேப்பிலை, காட்டுக் கறிவேப்பிலை என்பன அவை ஆகும்.
- நாட்டுக் கறிவேப்பிலையே உணவுப் பதார்த்தங்களில் பயன்படுத்தப்படுகிறது.
- இதன் இலை இனிப்பும், துவர்ப்பும், நறுமணமும் கொண்டுள்ளது.
- காய்கறிகளோ, ரசமோ இதன் தாளிதம் இன்றி மணம் பெறுவதில்லை.
- விவசாய முறையில் கறிவேப்பிலைச் செடியை எளிதாக வீட்டுத் தோட்டங்களிலும் பயிரிடலாம். எந்த மண்ணிலும் இது வளமாக வளரக்கூடியது.
- தொடக்கத்தில் இது ஒரு செடி போன்று தோன்றினாலும், நாளாவட்டத்தில் ஒரு மரமாகவே மாறி விடும்.
- இது ஆள் உயரத்திற்கு வளர்ந்ததும், அவ்வப்போது “கவாத்து’ செய்து கொண்டே இருக்க வேண்டும்.
- கவாத்து என்பது, இது மேலோட்டமாக வளர வளர வெட்டி விட்டுக் கொண்டே இருக்க வேண்டும்.
- இல்லை என்றால், பல மடங்கு உயரத்திற்கு வளர்ந்து கொண்டே செல்லும்.
- அவ்வாறு அதிகமான உயரத்திற்கு இது சென்று விட்டால், இலைகளைப் பறிப்பது அதிக கஷ்டமாகி விடும்.
- ஆனால், விவசாய வியாபார நோக்கத்தில் கிராமங்களில் வளர்க்கப்படும் இந்தத் தாவரத்தின் மேலோட்டமான கிளைகளை மிகக் கவனமாகப் பார்த்து அவ்வப்போது கண்காணித்து, கவாத்து செய்து, இது படர்ந்து விரிந்து செல்ல வல்ல தன்மையிலும் இலைகளுடன் கூடிய ஈர்க்குகளை எளிதில் முறித்து விலையாக்கவும் இயலும்.
- இது அதிகச்செலவு இல்லாமல் எளிதில் பலன் தர வல்லதாகும்.
- கறிவேப்பிலை மரம் கரிய சாம்பல் நிறம் கொண்ட பட்டையை உடையதாகும். இலைகள் ஈர்க்கில் இரு மருங்கும் அமைந்திருக்கும்.
- இந்த ஈர்க்கு ஏறத்தாழ 12 அங்குலம் வரை நீளம் உள்ளதாக இருக்கும். ஒரு ஈர்க்கில் 25 முதல் 30 இலைகள் உள்ளதைக் காணலாம். பூக்கள் கொத்துக் கொத்தாக கிளைகளின் நுனிகளில் இருப்பதைப் பார்க்கலாம்.
- கறிவேப்பிலைப் பழம் மிகச் சிறிய உருண்டை வடிவத்தில் இருக்கும்.
- இயற்கையான விவசாய முறையே கறிவேப்பிலைக்குச் சிறந்தது.
- மாதம் ஒருமுறை மரம் ஒன்றுக்கு ஒரு கிலோ கலப்பு உரம் இட்டு மண்ணைக் கிளறி விடுதல் நல்லது.
- இரண்டு நாட்களுக்கு ஒரு முறை போதிய தண்ணீர் ஊற்றி வர வேண்டும்.
- கறிவேப்பிலையில் அடங்கியுள்ள ரசாயனத் தன்மை காரணமாக, இது சரீரத்திற்கும் பலம் தர வல்லது. பசியைத் தூண்டி விடுகின்ற ஆற்றல் இதனில் உள்ளது. சரீரச் சூட்டைத் தகுந்த முறையில் உண்டாக்கும் தன்மை இதற்கு உண்டு.
- பொதுவாக, இதன் இலை, ஈர்க்கு, பட்டை, காம்பு ஆகிய அனைத்துமே உணவிற்காகவும், மருந்திற்காகவும் உபயோகம் ஆகின்றன. மென்று சாப்பிடப் பயன்படும் மூலிகைகளில் இதுவும் ஒன்று என்று கோவை ஈஷா யோகா மையம் இயம்புகிறது.
– எஸ்.நாகரத்தினம்
விருதுநகர்.
நன்றி: தினமலர்
பசுமை தமிழகம் மொபைல் ஆப் டவுன்லோட் செய்ய இங்கே கிளிக் செய்யவும்