வறட்சிக்கு ஏற்ற மரவள்ளிக்கிழங்கு சாகுபடி

தென்மாவட்டங்களில் தொடர்ந்து வறட்சி நிலவுவதால் எதிர்பார்த்த விளைச்சல் இல்லை. வறட்சியை தாக்குப்பிடித்து வளரும் மரவள்ளிக்கிழங்கு சாகுபடியில் சிவகங்கை மாவட்டம் காளையார்கோயில் சூசையப்பர்பட்டினம் விவசாயி எஸ்.ஜோசப் ஆரோக்கியசாமி கவனம் செலுத்தி வருகிறார்.

மரவள்ளிக்கிழங்கு சாகுபடியில் அதிக மகசூல் குறித்து ஜோசப் ஆரோக்கியசாமி கூறியதாவது:

  • வறட்சியான மாவட்டங்களில் சிவகங்கையும் ஒன்று. ஏற்கனவே குடிநீர் கூட கிடைக்காமல் பஞ்சம் நிலவுகிறது. சொட்டு நீர் பாசன முறையில் மரவள்ளிக்கிழங்கு சாகுபடி செய்கிறேன்.
  • நல்ல லாபம் கிடைப்பதால் இரண்டு ஆண்டுகளாக தொடர்ந்து மரவள்ளிக் கிழங்கையே பயிரிட்டு வருகிறேன். இந்த ஆண்டு 60 சென்டில் பயிரிட்டுள்ளேன்.
  • நாமக்கல், சேலம் உள்ளிட்ட மாவட்டங்களில் மழை குறைவான பகுதிகளில் மரவள்ளி கிழங்கு அதிகளவில் சாகுபடி செய்யப்படுகிறது. தொடர்ந்து சிவகங்கை மாவட்டத்திலும் வறட்சி நிலவுவதால் கிணறுகள் வறண்டு வருகின்றன. அதிக நீர் தேவையுள்ள நெல், வாழை போன்ற பயிர்களை சாகுபடி செய்ய முடியவில்லை.
  • இதனால் வறட்சியை தாங்கி வளரும் மரவள்ளிக் கிழங்கை சாகுபடி செய்கிறோம். குங்குமரோஸ், முள்ளிவாடி, வெள்ளைக்கிழங்கு போன்ற ரகங்கள் உள்ளன. இந்த கிழங்கு மூலம் ஜவ்வரிசி, பசை, சிப்ஸ், ஸ்டார்ச் போன்ற பல வகையான பொருட்கள் தயாரிக்கின்றனர். 
  • தமிழகம் மட்டுமின்றி வெளிநாடுகளிலும் நல்ல வரவேற்பு உள்ளது. அரை அடி நீளமுள்ள மரவள்ளி குச்சியை ஒரு இஞ்ச் ஆழத்தில் நட வேண்டும். ஏக்கருக்கு 5 ஆயிரம் குச்சிகள் நடலாம். மாதத்திற்கு இரண்டு முறை நீர் பாய்ச்சினால் போதும். பராமரிப்பு செலவும் குறைவு. கடலை, வெங்காயம், உளுந்து போன்றவற்றை ஊடு பயிராகவும் பயிரிடலாம்.
  • எட்டு முதல் பத்து மாதங்களில் மரவள்ளிகிழங்கை பறிக்கலாம். ஒரு செடியை பறித்தால் 4 முதல் 7 கிலோ வரை கிழங்கு கிடைக்கும். பறித்த குச்சியை மீண்டும் சாகுபடிக்கு பயன்படுத்தலாம்.
  • ஏக்கருக்கு 15 முதல் 20 டன் வரை கிடைக்கும். தற்போது வெளி மார்க்கெட்டில் ஒரு கிலோ 30 ரூபாய் வரை விற்கப்படுகிறது.
  • நாங்கள் ஈரோடு தொழிற்சாலைக்கு அனுப்புகிறோம். கிலோ 8 முதல் 10 ரூபாய்க்கு எடுத்து கொள்கின்றனர்.
  • ஏக்கருக்கு 10 ஆயிரம் ரூபாய் முதல் 15 ஆயிரம் ரூபாய் வரை மட்டுமே செலவாகும், என்றார்.

தொடர்புக்கு, 8489785434 .

இ.ஜெகநாதன்
சிவகங்கை.


பசுமை தமிழகம் மொபைல் ஆப் டவுன்லோட் செய்ய இங்கே கிளிக் செய்யவும்

Related Post

Leave a Reply

Your email address will not be published. Required fields are marked *