கத்திரிக்காய் வற்றலில் சாதித்த விவசாயி

புதுச்சேரி யூனியன் பிரதேசம் காரைக்கால் மாவட்டம் காவிரியின் கடைமடை பகுதியான நண்டலாறு, அரசலாறு, வாஞ்சியாறு உள்ளிட்ட காவிரியின் கிளை நதிகள் கடலில் சங்கமிக்கும் இடமாகத் திகழும் காரைக்கால் மாவட்டத்தில் காவிரி நீர் காலத்தோடு வராததாலும் பருவமழை பொய்த்ததாலும் பெரும்பாலான விவசாயிகள் நெல்லுக்கு மாற்றாக வேறு பயிர்கள் பயிரிடாது நிலத்தை தரிசாக விட்டுவிடுகின்றனர்.

இந்நிலையில் காரைக்காலை அடுத்த பேட்டை கிராமத்தைச் சேர்ந்த முருகபூபதி எனும் இளம் விவசாயி கடந்த 5 வருடங்களுக்கு மேலாக தனது நிலத்தில் நெல்லுக்கு மாற்றாக தோட்டப் பயிர்களைப் பயிரிட்டு அதை லாபகரமாகச் செயல்படுத்தி வருகிறார்.

முருகபூபதியிடம் பேசினோம். “குறைந்த நீரில் அதிக லாபம் தரக்கூடிய தோட்டப்பயிர்களான கத்திரி, பீர்க்கு , புடலை, கொத்தவரை, மிளகாய் போன்ற காய்கறிகளை விளைவித்து அவற்றைக் காரைக்கால் மாவட்டம் முழுவதும் விற்பனை செய்து வருகிறேன். முழுவதுமாக இயற்கைத் தொழில்நுட்பத்தில், உத்தரப்பிரதேசம் காஜியாபாத்தில் இயங்கிவரும் மத்திய அரசின் தேசிய இயற்கை விவசாய மையத்தில் தயாரிக்கப்பட்ட வேஸ்ட் டீகம்போசர் கரைசல் எனும் இயற்கை உரத்தைப் பயன்படுத்தியதால், இந்த ஆண்டு கத்திரிக்காய் அதிக விளைச்சல் கண்டு நல்ல தரமான, ருசியான காயாகவும் விளைந்தது. துரதிர்ஷ்டவசமாக கொரோனா காரணமாக ஊரடங்கு அமல்படுத்தப்பட்ட நிலையில் தமிழகம் மற்றும் புதுச்சேரி மாநில விவசாயிகளுக்குப் பெரும் பாதிப்பு ஏற்பட்டு விளைச்சலுக்குத் தகுந்த விலை கிடைக்காத நிலை உருவானது.